Xafladan oo ahayd mid si weyn loo soo agaasimay ayaa waxaa ka soo qeybgalay Siyaasiyiin, Aqoonyahano, Rugcadaa Taariikh ku leh Ciyaaraha Sportska Soomaaliyeed xiliyadii Bari samaadka.

Waxaana soo abaabulay dhalinyaro is xil qaantay kuwaas oo in mudaa dhexda u xirtay hirgalinta sidii loo heli lahaa Ciyaartooy dhaxal gal ah oo ka soo baxada dalka Maraykanka iyo canada.

Waxa ay xafladani isugu jirtay qeybo kala duwan waxaa hadalo ka jeediyay Dad miisaan ku leh Bulshada Soomaaliyeed, kuwaas oo uu kamid ahaa Cali Mire oo ah Taariikhyahan waayo badan soo joogay isla markaana ah Ninkii sameeyay Heesta Qaranka ee Soomaaliyeey Toos.


Cali Mire waxa uu ka hadlay hodantinimada Af-ka Soomaaliga isaga oo soo bandhigay tusaalooyin lagu qanci karo, iyo sida uu Afkeenu uga midka yahay Afafka Hodanka ah balse u bahan in la horumariyo, waxa uuna Cali Mire Goobta ka qaaday Heesta caankaa ee Soomaaliyeey Toos oo loowada sara joogsaday.

Maxamed C/laahi Farmaajo oo ahaa Raysul wasaarihii hore ee Dowladii KMG ahayd oo xaflada ka hadlay ayaa waxa uu dhankiisa amaanay Doorka Ciyaaraha Sportska Soomaalida ee 14 kii sano ee la soo dhaafay lagu qabanayay gobolka Ohio iyo sida dhalinyaradu ugu dadaaleen in kaalintooda Ciyaareed aysan meesha ka bixin.

Waxa uu farmaajo la dar daarmay dhalinta Soomaaliyeed oo uu ku guubaabiyay xoojinta Waxbarashada si ay dhaxal ugu noqdaan dalkooda iyo dadkooda iyo in ay Ciyaaraha sii laba jibaaraan si ay uga dhismaan maskax ahaan iyo jir ahaan, waxa uu Shahaado gudoonsiiyay C/laahi Xasan oo loo yaqaan (Macalin Tuke) oo soo Layliyay Kooxihii Jeenyo iyo Gaadiidka ee Xiligii dowladii dhexe ee Soomaaliya.

Marka laga hadlo dadkii ka hadlay xafladan oo ay soo buux dhaafiyeen dhalinyaro ka kala timid gobolada dalka Maraykanka iyo Canada, waxaa ka mid ahaa Russell Flickinger oo ah Qareen si weyn ugu adeega Soomaalida.

Russell Flickinger ayaa ku booriyay dhalinyarada Soomaalida sidii ay u xoojin lahayeen horumarinta Ciyaaraha iyo in ay waqtiga ka faaiidaystaan mudada ay dhalinta yar yihiin,isaga oo taageera qaar kamid ah Kooxaha ugu waaweyn ee ka ciyaara magaalada Columbus oo uu ku bixiyo dhaqaale Talo siin.

Mudadii ay socotay xaflada waxaa dadka madadaalinyay Kooxo kala duwan oo qaarkood soo bandhigay ciyaaro iyo Riwaayado,waxase si aan kala har lahayn uga qosliyay dadkii Goobta joogay Maajilistaha caankaa ee lagu magacaabo Mataan.

Xafladan oo daahfur u ahayd ciyaaraha Xagaaga 2014 oo ka furmay magaalada Columbus ayaa waxa goobjoog ahaa sidoo kale Rugcadaa ka mid ah ciyaaryahanadii soo maray Qarankii Soomaaliyeed, kuwaas oo ka kala yimid Canada iyo gobolada Maraykanka waxaa ka mid ahaa, Muqtaar Cuti, Suudaani, Qarindi, iyo Kuwo kale.

Waxa ay ciyaaraha xagaaga ee sanadkan oo biloowmay malinimadii Khamiista ay socon doonaan ilaa maalinta Axada.

Deeqo Shire (SONNA)
Columbus, OH
Deeqosonna@gmail.com