|
Magaalada Muqdisho ayaysan Maanta ka soo dajin wax jaad ah, balse deegaanno kale oo Somalia ka tirsan ayuu Qaad ka dagay; kaddib markii Dowladda Soomaaliya ay soo saartay amar ay ku joojisay diyaaradihii keeni jiray Somalia.
Goobihii jaadka lagu gedi jiray Muqdisho ayaa maanta waxaa lagu iibinayay qaar ka mid ah jaadkii xalay haray, waxaana ganacsatada iibiya iyo dadka cuna ay ka cabanayeen go’aanka Dowladda Federaalka Somalia ay ku joojisay Jaadka ama Qaadka.
Sidoo kale, Garoonka diyaaradaha magaalada Gaalkacyo ayay diyaarad jaad sida ka dagtay, iyadoo Ganacsatada Qaadka ee Puntland ay sheegeen in ay sii wadayaan in Jaadka ay soo dajintiisa ay sii wadayaan.
“Maanta Magaalada Gaalkacyo waxaa kasoo dagtay diyaarad sida jaad fara badan, go’aanka ay soo saartay Xukuumadda Federaalkana waa uu ka horreeyay dalabka Jaadkan maanta soo gaaray Puntland. Xukuumadda Puntland - waxba nooma sheegin, waana wadanaynaa in aan keenista Jaadka dalka Kenya,” ayuu BBC u sheegay mid ka mid ah Ganacsatada Jaadka ee Puntland oo magaciisa ku soo gaabiyay Maxamed.
Dhanka kale, Haweeney ka mid ah dadka Muqdisho ee Jaadka ka ganacsada oo la hadashay BBC ayaa iyaduna sheegtay in Jaadka ay ka biilan jirtay Carruurteeda ayna ka xun tahay in la joojiyo, iyadoo xustay inaysan garanayn wax ay sameyso inta dib looga furayo keenista jaadka.
“Aniga iyo haween kale oo badan oo jaadka iibiya ayaa carruurtooda ka biilan jiray jaadka, maantana wax Qaad ah ma imaan, Runtiina waa dhibaato weyn na soo Wajahday,” ayay tiri haweeney ka mid ah kuwa Jaadka ka ganacsada.
Ugu dambeyntii, Dowladd Federaalka Somalia, ayaa shalay ku dhawaaqday inay hakinayso keenista Jaadka, iyadoo aan sheegin sababta rasmiga ah ee loo joojiyay, inkastoo aysan jirin hadal ay kasoo saartay Jaadka ka dagay maanta Qaybo ka mid ah Soomaaliya.
Hargeysa Online