Ehelada dadkii dhawaan lagu dilay deegaan hoostaga degmada Bariire ayaa diiday in ay meydadka Aasaan, ilaa sida ay hadalka u dhigeen dowladda Soomaaliya ka qiraneyso in ay ka danbeysay dilka dadkan rayidka ah.

Tobanaan ruux ayaa la toogtay kaddib weerar ay wada jir uga fuliyeen degmada Bariire oo 50 km u jirta caasimada Muqdisho ciidamada dowladda Soomaaliya oo kaashanaya kuwa Mareykanka ah Jimcihii ina dhaafay.

Ali Nur oo ah guddoomiye ku-xigeenka gobolka Shabeellaha hoose ayaa u sheegay wakaalada wararka Reuters in aan dadkan la aasi doonin ilaa dowladda ay ka qiraneyso lagana bixiyo Magdhaw.

‘’Sababta aan u diidnay in aan Aasno waa dowladda oo aan wali qirsaneyn in ay dilkan geystay ayuu yiri Ali Nuur oo la hadlay Reuters.

Waxaa uu sheegay in dowladda looga fadhiyo in ay qirato dilka dadkan rayidka ah kaddibna ka bixiso sida uu hadalka u dhigay Magdhaw.

Dadkan ayaa hadda xabaale ku-meel-gaar ah looga dhigay gadiidka qaboojiyayaasha halkaasoo meydkooda lagu hayo, madaama Eheladu ka biyo diideen in ay Aasaan.

Taliska Mareykanka ee  Africom ayaa sheegay in ay ku lug lahaayeen weerarkii ka dhacay deegaanka Bariire, balse waxaa ay sheegeen in ay baarayaan warka ku saabsan in dad rayid ah la dilay.

Wasaarada gaashaandhiga Soomaaliya ayaa markii ugu horeysayba war ay soo saartay ku sheegtay in dadkan la dilay hubeysnaa, laakiin taliska militariga  ayaa markii danbe sheegay in dadka dhintay dhamaantood ahaayeen dad rayid ah.

Dowladda Soomaaliya ayaa arintan u saartay guddi isugu jiray wasiiro iyo saraakiil ciidan oo loo qabtay in mudo shan cisho ah jawaab uga bixiyaan dhacdadii Bariire.

Hargeysa Online