Al Franken oo ah mid ka ah labada xubnaha (Senate) laga soo doorto gobolka Minnesota.

Al Franken oo ah mid ka ah labada xubnaha (Senate) laga soo doorto gobolka Minnesota, ayaa Cusmaan Cali Axmed oo ah wiil Soomaali ah u magacaabay xubin ka mid ah shaqaalaha tirada yar ee ka shaqeynaya xaafiiskiisa, iyadoo Cusmaan uu noqoyo qofkii ugu horreyey ee ka soo jeeda bariga Afrika oo loo magacaabo xilkaas tan iyo intii la doortay Al Franken. Cusmaan Cali Axmed, ayaa sheegay in uu ku faraxsan yahay xilka loo magacaabay, isagoo intaasi ku daray tani ay tahay mid sare u qaadaysa kalsoonida Soomaalida iyo xirfaddiisa shaqo, islamarkaana ku abuuraysa dhiiranaan iyo dadaal dheeri ah. “Waxaan ku faraxsanahay in aan ka mid noqdo shaqaalaha xildhibaan Al Franken, aad ayaana u qanacsanahay in aan la shaqeeyo mid ka mid ah xildhibaanadda Mareykanka ee ugu maskaxda iyo degganaanta badan,”

ayuu yiri Cusmaan Axmed. Wiilkaan Soomaaliga ah ayaa ka mid ah dhalinyarada Soomaalida ee muddooyinkii ugu dambeeyey sida weyn uga dhex-muuqday siyaasadda gobolka Minnesota, isagoo la soo shaqeeyey siyaasiin xilal waaweyn ka qabtay gobolka, kuwaasi oo ay ka mid yihiin: Al Franken oo dhawaan markii labaad loo doortay aqalka sare ee Mareykanka, Keith Allison oo isna markii labaad loo doortay aqalka Koongareeska, iyo gabadha dhawaan loo doortay duqa magaalada Minneapolis Betsy Hodges. Cusmaan ayaa xiliyadda doorashada lagu arki jiray goobaha ay Somalidu ku badan tahay, isagoo u ololaynaya shaqsiyaadkaasi, isagoo markii ugu dambeysay ololaha doorashadiisa si weyn ugala shaqeeyey xildhibaal Al Franken, oo shalay markii labaad loo dhaariyey xaafiiska. Ma ahan Cusmaan oo kaliya shaqsiyaadka la shaqeynaya madaxda laga soo doortay gobolka Minnesota, sidoo kale Betsy Hodges oo iyadana dhawaan loo doortay duqa magaaladda Minneapolis ayaa Cabdiraxmaan Muuse oo ah isna Soomaali u magacowday la taliyaheeda sare ee dhinaca siyaasadda. Soomaalida Mareykanka ayaa gobolka Minnesota wuxuu u yahay halka ugu badan ee ay ku nool yihiin marka la eego dalka Mareykanka, waxayna ay kaalin fir-fircoon ku leeyihiin dhaqdhaaqyada bulshada sida: siyaasadda, ganacsiga, iyo waxbarashada. Waxaa sidoo kale ay ka shaqeeyaan xafiisyada dowladda iyo hay’addaha amniga sida booliska.

Hargeysa Online.Net