Xafiisyada dhinaca warfaafinta u qaabilsan madaxda maamul Goboleedyada Soomaaliya ayaa warbixinno ay soo saareen waxay kaga hadleen kulankii u dembeeyay ee hoggaamiyayaashaasi ay la yeesheen madaxweynaha dalka Soomaaliya Maxamed Cabdullaahi Farmaajo iyo ra’iisul wasaare Xasan Cali Kheyre .

 


Xafiisyada warfaafinta madaxweynayaasha Galmudug, Koonfur galbeed. Jubaland, Hirshabeelle iyo Puntland ayaa waxay dhammaan ku qoreen warbixinadooda in kulankii dhacay uu geed xaar u ahaa shirka looga hadlayo xaaladda kala guurka ah ee Soomaaliya iyo hannaanka doorashooyinka 2020/2021.

Dhowaan waxaa la filayaa in magaalada Dhuusamareeb ee caasimadda Galmudug uu ka furmo shirka maamullada qeybta ka ah faderaalka, maamulka Gobolka Banaadir iyo madaxda sare ee dowladda Soomaaliya, gaar ahaan madaxweynaha iyo ra’iisul wasaaraha. Waxaana lagu falanqeyn doonaa xaaladda dalka sida amniga, doorashada iyo wada shaqeynta maamulladaasi iyo dowladda dhexe ee uusan qaar xiriirkooda wanaagsaneyn.

Waxaana la filayaa in kulankaasi si gaar ah looga doodo hannaanka doorashooyinka oo si weyn isha loogu wada hayo .


Hargeysa Online