Dowladda Shiinaha ayaa Soomaaliya ugu deeqday lacag dhan 2 milyan oo doollar iyo raashin gargaar ah si loo taageero dadka ay saameeyeen abaaraha ka jira qaybo badan oo ka mid ah dalka.

Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Maxamuud Macalin Cabdulle, ayaa si rasmi ah uga guddoomay deeqdan Safiirka Shiinaha ee Soomaaliya, Mudane Wang Yu, munaasabad ka dhacday magaalada Muqdisho.

Safiirka Shiinaha Wang Yu ayaa sheegay in dowladda Shiinaha ay sii wadi doonto taageerada ay siiso shacabka Soomaaliyeed, gaar ahaan dhinacyada gurmadka abaaraha iyo u diyaar garowga ka hortagga musiibooyinka. 

Wuxuu sidoo kale carrabka ku adkeeyay muhiimadda ay leedahay xoojinta iskaashiga labada dal ee dhinacyada gargaarka bani’aadannimo iyo horumarinta bulshada.

Dhankiisa, Guddoomiyaha SoDMA Maxamuud Macalin Cabdulle ayaa uga mahadceliyay dowladda iyo shacabka Shiinaha taageerada joogtada ah ee ay la garab taagan yihiin Soomaaliya. Wuxuu xusay in deeqdan loogu talagalay in lagu caawiyo dadka ku nool 72 degmo oo ka tirsan gobollada dalka oo ay saameeyeen abaaraha, kuwaas oo ay ku jiraan 45 degmo oo xaalad degdeg ah ku sugan.

Guddoomiyuhu wuxuu tilmaamay in gargaarkan si gaar ah diiradda loogu saari doono dadka ugu nugul ee ay abaaruhu saameeyeen, sida carruurta, haweenka, iyo qoysaska danyarta ah, si loo badbaadiyo noloshooda loona yareeyo saameynta abaarta.

Deeqdan ayaa qeyb ka ah taageerada bani’aadannimo ee ay dowladda Shiinaha si joogto ah u siiso Soomaaliya, iyadoo lagu xoojinayo dadaallada lagu caawinayo dadka ay saameeyeen xaaladaha adag ee ka dhasha abaaraha iyo musiibooyinka kale.