maansadan heemaal mwaa maanso xaqiiqiyan ka waramaysa xornimadii somaliland oo dadka necebi ay u yaqaaniin xornimadii gobolada waqooyi xaqiraad darteed ayaanay u karin maga dhabta ah ee ay kula soo midowday waxa kale oo ay ka hadlaysaa wixii ay dhashay gobonimadaa iyo midowgeediiba waana tan ee akhris wanaagsan waxaanay soo baxday 18.11.1990- Maansada hankeedii
- Xarfihiyo hingaadii
- Anoo dhigay habkeedii
- Anigoo ka haayiray
- Indhawaydna aan hurin
- Habdhaca iyo luuqdii
- Maaansadaan holobin jiray
- Kula baxay horyaalnimo
- Huri jiray markay tahay
- Anoon haybin waayadan
- Hareer maray fankeedii
- Goobahaan ka heli jiray
- Hor allee anoon dayin
- Anigoon ku howshoon
- Hoorimaadka sida mayay
- Iyo heego curatoo
- Hibitiqa dhigeedii
- Anoon hoorin waayadan
- U hiinraagin sidii aar
- Hareer maray aftahanimo
- Markii ay hungeeyeen
- Halgaab uu shirkii yimi
- Heelada la wada galay
- Hal abuurka maansada
- Ninwaliba hankii yidhi
- Boodhaaqu soo hiray
- Ayaan heedhe cumarow
- Hakiyoon ka gaabsaday
- Maantana hankeedii
- Af hingaada badiyaa
- Hedoo sababta mooyee
- Hadal kama bakhaylee
- Aan holiyo murtida eray
- Hinjiyoo u dhaadhaco
- Aan habeeyo geeraar
- Ha iyo woowga aan simo
- Hasheenii xidaysnayd
- Heemaal la odhan jiray
- Maandeeqdaan haraadkiyo
- Haaneedku gaagixin
- Hadhuub laga malegi jiray
- Ee haanta loo culay
- Loo hogeeyey gorofyada
- Hashii ay gulaankiyo
- Kediga iyo hiishiyo
- Haqab li'i baldhoolaha
- Geesiyo u hagar baxay
- Ka hamuun tireenee
- Hadba meesha cosobka ah
- Hadhiciyo tigaada leh
- Ku hagaajinaayeen
- Dhebiyeey hasheenii
- Markuu heeray cadawgeen
- Ee heshiiska loo galay
- Gaalkii hagoognaa
- Dhacau uu la haayiray
- Ay haybinteedii
- Geesiyaal u hoydeen
- Darteed hubuq yidhaahdeen
- Hashay soo dhacsheeneen
- Hareeraha ka raacnee
- Harqadaha qurxoon iyo
- Hoobaanta laamaha
- Aan u haadinaynee
- U hilownay faraxee
- Hogoshii na haysiyo
- Habiskiyo daroortii
- Hugayaga ka dhaadhacay
- Aanaan ka hoyanee
- Ku hiyaayiroonee
- Aan aamiinta haynee
- Hiiliyow badbaadee
- Aan hanano sharafoo
- Caalamkaa horuu maray
- Qaran daba hadaafiyo
- Aanu hiigsad noqonee
- Hashii aan lahaynee
- Naqa loo hilaadshee
- Darka aan u haynee
- Ka horjoognay bohoshiyo
- Hataq jebisa dhuuxiyo
- Agaraadam halisee
- Gaadhka aan ka haynaa
- Horor iyo waraabiyo
- Gidi habar dugaagii
- Hadh cad ay malgeenoo
- Intay hooto geliyeen
- Haniyaha ku gooyeen
- Raqdii looma kala hadhin
- Waxse dagay haleelada
- Shalay kii hayaanshee
- Hogaankeedi qaatee
- Foofshay saaka hiirtii
- Hubsiimana kumuu darin
- In fudaydka heemaal
- Uu hadiyadow dhigay
- Ay xigi hawaarina
- Se raqdii habeenkaa
- Habaarqabe dhurwaayoo
- Hor allee gabanayaa
- Markuu waayay hugun iyo
- Hiinraag kolay tahay
- ku hubsaday inuu aar
- Habeenkaa ka maqan yahay
- Ayuu haw ku soo yidhi
- Inta uuy ishunbulayuu
- Haybad aanu geyin iyo
- Uu giir holadayuu
- Hadba dhinac talaabada
- Uu hareer u qaaduu
- Aarka hootadiisiyo
- Kursigii ku hubuq yidhi
- Halcabaara tiiyoon
- Dhana laysu hadal celin
- Ayuu yidhi habaarqabe
- Gidi habar dugaagow
- Raqdan waynu haynaa
- Inqilaab haboon iyo
- Hawlbaanu fulinoo
- Gudi saraa habaysoo
- Anigow hormuudee
- Hoos iyo kor ii daya
- Haybadayda joogiyo
- Awoodayda halacsada
- Macid iga hanwaynoo
- I humaajinaysoo
- Ila mida horyaalnimo
- Ila siman hormuudnimo
- Ila heera bare nimo
- Loo huro aftahanimo
- Ila dhiga hogaankana
- Hal adayga ilamida
- Amaantayda helikara
- Oo iga horayn kara
- Hirdin iigu babac dhiga
- Oo ay hooyo dihatoo
- Ma ila haybadaa jira?
- Hanjabaadna ugu daray
- Ninka hawsha diidee
- Kacaankays hortaagee
- Xukunkayga hiifana
- Sharci uu ku hoogiyo
- Hedgooyaan u jarayaa
- Intaan cidi u hadal celin
- Ayuu yidhi habaarqabe
- Raqdan aynu haynee
- Hilbaheedu qalan yahay
- Ayaan qayb haleelsiin
- Qofkastaba halkiisee
- Uheensaysta idilkiin
- Marka ugu horaysana
- Hilbaa daribtu waa ani
- Haybaa leh waaxyaha
- Horta mowtaqaanaan
- Magacayga haybana?
- Hooluflayda dacawana
- Hareertaa tun ugu jiid
- Iyadu hayska hiigtee
- Hooyaan wadaagnoo
- Dhidar maan hilmaamine
- Hungurigiyo calooshiyo
- Xiidmaha haloo jaro
- Kaan dhalee hurdana kici
- Yarku maaha hebedoo
- Ma yaqaan hangaridoo
- Ma hawshoonin weliyoo
- Habeen diif ma seexane
- U hogeeya beerkoo
- Kelidii haloo dhigo
- Haada waa ku xaydhaha
- Habartayda nuurtana
- Iyana waa hanbada iyo
- Wixii neefka soo hadha
- Gidi habar dugaagoo
- Hungo madhan tirsanayiyo
- Halkastood ka eegtaba
- Waraaboo ka haqabtiran
- Iyo waxaysku soo hadhay
- Haragii hashoo qudha
- Suu yidhi habaar qabe
- Waxaan ahay hilaaciin
- Hogaankiini baan ahay
- Macalin horumarshaan ahay
- Hilinkii xaqaan ahay
- Cadaalad aad ku hirataan
- Kii idiin hurshaan ahay
- Ee habar dugaagow
- Hadhac aan ka taliyiyo
- Hooy baan u baahnahay
- Waxseen taa ku helayaa
- Hadalkoo yaraadiyo
- Intaad hawsha badisaan
- Haragaa dudada yaal
- Idinkoy hadoodila
- Kala haab alaylehe
- Hawraar ayaa tidhi
- Hunguraan wedkii arag
- Haybow laysla waa laba
- Waxaan uga hogleeyahay
- Hilbihii nin kaydsaday
- Hodantii dadka u tiil
- Misna ii hadoodila
- Wixii qayb u soo hadhay
- Iyadoo aan lala hudhin
- Miyaa laysku helayaa?
- Kala haab alaylehe
- Dawacaa u tidhi hoos
- Hamhamtiyo faqiibaa
- Laysu kala hormeeyoo
- Dockalay ka huguntoo
- Hayiin iyo dayiin iyo
- Tiiyoon looba kala hadhin
- Hugbaa laysku soo yidhi
- Wuxu hadalki faagtoo
- Hawraari gunudoo
- Dantu ay hogaysaba
- Wuxuu yimi heshiiskii
- Go'aankiina lagu hilay
- Inaan hebedla noqonoo
- Hayin layska dhiginoo
- Aan heeryo lagu rarin
- Had kastoo la doonana
- Layska saarin haamaha
- Dhayal loo hogaan qaban
- Wuxuu yimid heshiiskii
- Go'aankiina lagu hilay
- Halgan iyo colaad dhaba
- Afartaa hankaygiyo
- Hindisahaan lahaa iyo
- Dheh hansaasahaygii
- Murtidaan ku hiri jiray
- Iyo heeladaydii
- Ha'da kalena iiwaa
- Waaryaa habaarqabe
- Intaaad beel hormuud iyo
- Aad u tahay hanaanshee
- Habaysee ku jecel adi
- Ee hiil qabyaaladi
- Ileen waa halbowlee
- Hinji aad isleedahay
- Iyo kuwan aad heertee
- Hungaysee ku neceb adi
- Gilgishee huq iyo ciil
- Heeryadiisa tuuree
- Kuu haysta gaashaan
- Iyo hooto iyo waran
- Kula sugaya hogobaha
- Inay kugu halgaadaan
- Inta aanay kula helin
- Kula hadhin taraysadu
- Heda aanay kaa qaban
- Beryo aad ka haagtide
- Hayb hayb ukala sooc
- Haan haan u kala goo
- Inta ba'an hormo u goo
- Hubka qaar isugu dhiib
- Hanadkiyo wax garatada
- Gaaleefta ka horgee
- Halyeeyga iyo geesigu
- Yaanu dhixin habeen qudha
- Hantiilaha midhmidh u qabo
- Hal abuurku yuu bixin
- Habataqa ku noolee
- Kuwa haysta garashada
- Aqoon yahanka haylhayl
- Yaanu hiban wixii dhumay
- Hantidooda maqan dayin
- Hayntana ka faaloon
- Nacaskiyo hacoogiyo
- Haweenkiyo magaratada
- Inta uu hunguri wado
- Haku daba hadaafaan
- Haku dhinac hashleeyaan
- Darna hilimadoodiyo
- Hoygooda nololeed
- Ka haloosi keligaa
- Aqoontaadi hoogtee
- Kastarkii habaaniyo
- Liilan aad ka haysee
- Hitler adiga kuu dhigay
- Hormee oo u talidii
- Madhi oo hungeedii
- Waxba hawla kala hadhin
- Waxse holaca kugu shiday
- Kugu oogay halasaha
- Kuwaad nolosha heertee
- Halbowlahooda dhiigiyo
- Xididada halgaadee
- Aad hanaqa goysee
- Waa lays hirdiyayee
- Kol haduusla kaa rogay
- Ha qawadin habeenkani
- Waa hadhuub aad dhigatoo
- Hurgumiyo qadhaadhloo
- Aad dhabanka haysee
- Hirqo oo hasii dayn
- Maahmaah horaa tidhi
- Hog aad dabin ka wadatiyo
- Ruuxow ha qodin bohol
- Hadii aad qodana hoy
- Ha dheerayn adoon hubin
- Inaad hoboq ku baridoo
- Hadimadu ku gelisee
- Allaylehe hirkaagii
- Hindisiyo kaskaagii
- Guul u heesidaadii
- Haandaloosha weeyaan
- Dadkaagoo haraad qaba
- Hilayga aad ka goysee
- Horta goror ma leedahay?
- Wax hadhuudh la saaroo
- Dheri loogu hawl galo?
- Hiif bi'iya daayoo
- Gunta huur qoyaan liyo
- Gocgoc yari makaga hadhay
- Hed baxaysa lagu dayo
- Kuu mara hunguri adi
- Ajal aad u hayside
- Afartaa hankaygiyo
- Dheh hansaasahaygii
- Murtidaan ku hiri jiray
- Iyo heeladaydii
- Ha'da kalena ii waa
- Kacaankii hawaariyo
- Aaway himiladiisii
- Maxaa oktoobartii helay
- Hadii aanu holociyo
- Hanfigii ku wada marin
- Kugu shidin halyeeyadu
- Maad heegan kaagiyo
- Hororyahow damaashaad
- Dhaqankii ku hirataan
- Maxaa hawsha gacankiyo
- Haysta carabta kaa galay
- Adoon taada hedan karin
- Shaydaan huyuuj laa
- Dubur hawd ka xulay beri
- Wuxuu sii hadaafaba
- Halkuu xaabo ku ogaa
- Ayuu xadhigi hoos dhigay
- Dhawr jeer is hayl hayl
- Hinjinwaa itaalkii
- Manuu helin badhsii dhigo
- Marlabaad ayuu hilay
- Dhigiisii nin haariban
- Isaguba hunguuf ihi
- Hayaan reer ah gaadiid
- Hibo mowgu deeqaa
- Arooskeed ka heestoy
- Hoobaydaada mooyee
- Hubso dhulu dhacaagoo
- Is hagaaji maandheey
- Adna huubo gocayooy
- Habaarqabe dhurwaayoow
- Hawadaa ku sidatoo
- Habeenkaad lahayd iyo
- Hadhkaagii inuu tegay
- Haayiray kalkaagii
- Hoosiisku been yahay
- Ay timi hedaadii
- Waad hubtaaye meel dhigo
- Adoo nool hog sii qodo
- Walee kaama hadhayee.........................................................
allaa mahad iska leh dhamaanteed
maxamed yaasiin maxamed ilkacase...........
[email protected]