|
|
Dabley hubeysan ayaa afduubatay dooni xoolo Nool ka qaaday dekeda magaalada Boosaaso ee gobolka Bari, iyadoo illaa hadda aan la ogeyn halka ay la’aadeen.
Wararku waxay sheegayaan in doonidan oo lagu magacaabo Shaahi Al-Nuuri ay shalay ka furatay dekeda magaalada Boosaaso iyadoo waday xoolo Lo’ ah oo tiradoodu gaareysay illaa 600 oo neef.
Wakiilka doontaas oo lagu magacaabo Xareed Maxamuud Yuusuf ayaa warbaahinta u sheegay in kooxo hubeysan ay doontaas u gacan gashay wax yar ka dib markii ay ka furatay dekeda magaalada Boosaaso.
“Markii doontaas ay gaartay meel dekeda Boosaaso ka baxsan 20-mile ayaa kooxo hubeysan oo burcad badeed loo maleynayo ay weerar ku soo qaadeen, weyna afduubteen illaa haddana naqaano meel ay la aadeen” ayuu intaa ku daray Xareed Maxamuud Yuusuf.
Waxaa uu intaa ku daray Xareed in doonida oo ku sii jeeday, xoolahana u waday dalka Qatar ay la socdeen 15 shaqaale dhamaantood u dhashay dalka India, isagoo xusay in ciidamada Puntland ay ku wargeliyeen arintan ayna sugayaan talaabada ay qaadaan.
Hargeysa Online
