Qasaaraha ka dhashay qaraxii xalay ka dhacay Hotelka Maka Al-Mukarama ee magaalada Muqdisho ayaa kordhay, iyadoo weerarkan ay sheegteen Xarakada Al-Shabaab.

Afhayeenka Ciidamada Booliska Soomaaliya Col. Maxamed Cumar Madaale ayaa sheegay in qaraxan ay ku dhinteenilaa shan ruux, 25-kalena ay ku dhaawacmeen, isagoo tilmaamay inay gacanta ku dhigeen Ciidamada ammaanka ruux doonayay inuu isku qarxiyo gudaha Hotelka Maka Al-Mukarama.

Col. Madaale ayaa sheegay in ciidamada ammaanka intii ay ku mashquulsanaayeen baaritaanka ninka la qabtay uu qaraxay baabuur banaanka hotelka yaala, kaasoo uu xusay in la doonayay in dad badan lagu laayo.

“Ruuxa doonayay inuu gudaha isku qarxiyo oo watay Laptop ayaa wax ka qaldameen, isagana waxaa qabtay dadkii Hotelka ku jiray oo u gacan geliyay ciidamada ammaanka, ninkaas wajiga wax ka gaaray, wixii uu diyaarsadaya waa u suura geli waayay”ayuu yiri Col. Madaale.

Dhinaca kale Afhayeenka howl galada Shabaab Sheekh C/casiis Abuu Muscab oo la hadlay wakaaladaha wararka ayaa sheegay in labo qarax ay ka geysteen Hotelka Maka Al-Mukarama, isla markaana weerarka ay qaadeen uu sidii loogu tala galay u dhacay, isla markaana Hotelka ay beegsadeen ay degenaayeen Mas’uuliyiin ka tirsan dowladda.

Weerarkan ayaa waxaa cambaareeyay Ra’iisul Wasaaraha Soomaaliya Cabdi Faarax Shirdoon oo tacsi u diray dadkii ku dhintay, wuxuuna u rajeeyay dadkii ku dhaawacmay in Alle uu bogsiiyo.

Qaraxii xalay ayaa waxaa ku dhintay C/qaadir Aadan Cali oo loo yaqiin Dhuub, kaasoo ahaa arrimo fuliyihii Safaarada Soomaaliya ee Ingiriiska, isagoo ka mid ahaa hogaamiyeyaasha qurba joogta ee dalka Ingiriiska.

Maxamed Xasan dheere.
Xafiiska Wararka ee Hargeysa Online
Hargeysa Somaliland.