Xildhibaan Ibraaahim Axmed Iimaan oo ka tirsan xildhibaanada golaha deegaanka Boorama, ayaa xildhibaan Cali Aareeye oo ka mid ah golaha Wakiilada Somaliland, ku eedeeyey inuu fidmo iyo iska horkeen uu kula dhex jiro beelaha wada dega gobolka Selel, isla markaana ay taladiisu noqotay aflagaadaynta qaawan ee uu ku hayo Madaxda Qaranka oo madaxweyne ku xigeenka Somaliland ka mid yahay.

Xildhibaan Ibraaahim Axmed ayaa sidaasi ku sheegay ,

waxaanu Xildhibaan Cali Aareeye ugu baaqay inuu ka waantoobo dacaayadaha iyo hadalada cunfiga leh ee uu Hargeysa kaga dhex tiraabo, waxaanu sheegay in Cali Aareeye aanu mar kaliya ka hadlin baahiyaha ka jira deegaankaasi gobolka Selel.

“Xildhibaan Cali Aareeyo oo aflagaadaynaya masuuliyiinta qaranka oo uu ugu horeeyo Madaxweyne ku xigeenka Somaliland Cabdiraxmaan Saylici ayaa sidoo kale waxa uu deegaanka Selel ee uu ka soo jeedo xildhibaanku ka wadaa fidmo iyo iska horkeenka bulshada halkaasi wada degta, xildhibaanka waxaan leenahay anagaa Abti kuu codaynay oo ku soo saarnaye, qaranka ha dumin oo dadkana ha iska hor keenine amniga iyo nabad ku wada noolaanshaha dadka walaalaha ah ee meesha wada dega qayb ka qaado, intaad u horseedaysid colaad iyo iska hor keenka bulshada oo maalinba aad Hargeysa kaga dhex Tiraabaysid Hadalo bulshada Cunfi kala dhex dhigaya”. Ayuu yidhi Xildhibaan Ibraahim Axmed Iimaan, waxaanu intaasi ku daray “Cali waxaan leeyahay intii xildhibaannimada laguu doortay maalin kaliya si xor ah adigoo deegaanka uga hadlaya oo baahiyaha bulshada ka hadlaya xildhibaan laguma maqal lagumana arage, ma in aad Hargeysa ka soo caytanto oo aanaad deegaankii lagaa doortay iman ayay taladaadi noqotay.

Ifraax maxamed cismaan.
Xafiiska Wararka ee Hargeysa Online.
Hargeysa Somaliland.